Миссиясы
Республиканын социалдык- экономикалык өнүгүүсүн камсыздоо үчүн, ылдам өзгөрүп жаткан дүйнөдө кесиптик ишмердүүлүк жүргүзүү жана коомдук адептик, маданий, илимий баалуулуктарын илгерилетүүгө жөндөмдүү, компетенттүү адисти даярдоо.
Тоо элинин теңир берген олжосу
Жаштарына билим берип колдоочу
Тоо койнуна ачкан ушул окуу жай
Теңир-Тоонун илим-билим ордосу
Кайырма:
Нарындай туйлап шар аккан
Нарк менен алга бараткан
Заманбап биздин окуу жай
Атына заты жарашкан.
Күн дайыма тийип турат чокуга
Тоолук жаштар өсөт дайым окууда
Нарындыктар башкаларды тандатып
Ар илимге улам салым кошууда
Кайырма:
Алыс барбай алам илим олжону
Адабият-маданият борбору
Ала-Тооунун сыймыгы бул окуу жай
Ардактоочу байлыгыбыз колдогу



Нарын мамлекеттик университети бийик тоолуу жергебизде 1996-жылдын 22-майында Кыргыз Республикасынын Президентинин Указы менен Нарын айыл чарба техникумунун, Мамбетакунов Кадырбай атындагы педагогикалык окуу жайынын, облустук мугалимдердин билимин жогорулатуу институтунунжана Кыргыз архитектуралык курулуш институтунун облустук филиалынын базасында Нарын шаарында ачылган.
Университеттин ачылышы Нарын эли үчүн чоң сыймык болуп, республикага керектүү жогорку билимдүү кадрларды даярдоо менен гана чектелбестен, калктын социалдык — маданий маселелерин чечүүгө да салым кошту.
Кыргыз Республикасынын Өкмөтүнүн 2009-жылдын 18-декабрындагы Токтомуна ылайык Нарын мамлекеттик университетине Сатыбалды Нааматовдун ысымы ыйгарылган.
Сатыбалды Нааматов кыргыз интеллигенциясынын 20−30-жылдардагы алгачкы билимдүү өкүлдөрүнүн бири, ал бир нече окуу китептеринин автору катары өлкөдөгү сабатсыздыкты жоюу, социалдык-маданий, агартуу тармагына эбегейсиз салымын кошкон инсан катары белгилүү.
Азыркы убакта Сатыбалды Нааматов атындагы Нарын мамлекеттик университетинде күндүзгү бөлүмдө төрт факультет: агрардык-техникалык факультети, педагогикалык факультети, экономика жана дене күч маданияты факультети, филология факультети, сырттан окутуу департаменти жана Нарын педагогикалык колледжи, агрардык-экономикалык колледжи, мугалимдердин билимин өркүндөтүү борбору бар.
Ар бир факультетте заманбап компьютердик класстар иш алып барууда. Бардык компьютерлер интернет түйүндөрүнө кошулгандыктан профессордук-окутуучулук жамаат жана студенттер үчүн кенен мүмкүнчүлүктөр түзүлгөн.